نصائح شراء سيارة مستعملة

لسا مشتري عربية مستعملة المفروض اعمل ايه ؟
اول حاجة لازم تشوف زيوت العربية كلها زي الموتور والفتيس وهكذا، وده علي حسب انت شاري عربية مانويل ولا اوتوماتيك وهل حديثه مثلا من سنه ٢٠٠٠ وانت طالع ولا اقل موديل تسعينات او اقل ، كل موديل وكل عربية ليها مواصفات معينه خاصه بيها فانت بتسال علي عربيتك بالتحديد و ايه الزيوت الي موجوده و تاخدها مركز صيانه او توكيل او بنزينة وتكشف علي الزيوت ، كمان تراجع علي السيور والفلاتر ويفضل طالما العربية مستعمله انك تغير كل الحاجات دي علشان تبقي انت عارف امتي غيرتهم وامتي ميعاد التغيير الجاي علشان تحافظ علي حالة عربيتك كويسة .
كمان تكشف علي دورة التبريد والريداتير عشان تتأكد ان العربية التبريد فيها كويس ومفيش تسريب ومتسخنش لا قدر الله .
كمان حالة الكاوتش لو محتاجة تتغير لازم تغيرها لان الكاوتش بيفرق في تماسك العربية علي الارض وكمان استهلاك البنزين .
كمان لو العربية فيها بارومة يفضل تتعمل لان مع الوقت هتزيد و هتسبب مشاكل اكبر .
.البارومة هي تاكل الصاج بتاع العربية بسبب العوامل الجوية والمياة وهكذا .